„Milljón Stjörnu Hátíðin“: LoveStar í ljósi vísindaskáldskapar og hugmyndafræði nýfrjálshyggju

Í þessari ritgerð verður fjallað um skáldverkið LoveStar (2002) eftir Andra Snæ Magnason með hliðsjón af kenningum um vísindaskáldskap og virkni þeirrar bókmenntagreinar. Í fyrstu verður fjallað um nýfrjálshyggju sem hugmyndafræði og áhrif hennar á menningu og samfélög heimsins. Þar verður stuðst við skrif Guðna Elíssonar um nýfrjálshyggjuorðræðu, rit Johns Gray Black Mass: Apocalyptic Religion and the Death of Utopia, auk fræðirita um íslenska sögu. Í framhaldinu verður fjallað um staðleysur í bókmenntum og einna helst vísindaskáldskap. Notast verður við ýmsar fræðigreinar um einkenni staðleysunnar og sögulegt gildi hennar. Kaflinn þar á eftir tekur fyrir virkni vísindaskáldskapar og tengir við fyrri hugmyndir um staðleysur og nýfrjálshyggju. Verður þar hugað að hvernig virkja má vísindaskáldskap til samfélagsgreiningar og spurt í framhaldinu með hvaða hætti samfélagslegum og pólitískum boðskap greinarinnar er almennt miðlað. Eftir það er sjónum beint að loftslagsmálum, þá sérstaklega orðræðugreiningu Guðna Elíssonar á loftslagsvandanum, og hvernig verk Andra Snæs kallast á við samtímann og umræðuna sem nú er allsráðandi á heimsvísu: Hvernig á mannkynið að glíma við hnattræna hlýnun? Loks verður skáldsagan LoveStar greind út frá hugmyndum vísindaskáldskapar um framtíðartækni og hátæknisamfélag sögunnar skoðað í ljósi fyrrnefndra þátta